O filial celeste chega ao feudo granate con 60 puntos, situándose como segundo clasificado do Grupo 1 de Primeira RFEF, só por detrás do líder, o Tenerife CF, que suma 69 puntos. Inmediatamente despois atópase o Pontevedra, que acumula 52 puntos tras recuperar o seu mellor nivel nos dous últimos encontros da competición.

O conxunto granate vén de dúas vitorias consecutivas: un 3-1 fronte á Ponferradina e un 1-4 a domicilio contra o Guadalajara. Pola súa banda, o Celta B gañou tres dos seus últimos catro partidos, superando ao Athletic Club B, Arenas de Getxo e Cacereño, cunha única derrota ante o Real Madrid B por 5-1.

A pesar dunha racha de catro xornadas sen gañar fóra da casa, o Pontevedra CF demostrou ser un equipo estable ao longo da tempada. Na primeira volta da liga, foi o visitante máis temido do Grupo 1, e pechou a primeira metade da competición cunha eficacia similar tanto como local (59,62% dos puntos) como visitante (56,67%).

Para este encontro tan relevante, o club granate lanzou unha promoción especial para os seus abonados. Cada socio poderá retirar unha entrada adicional para a súa mesma bancada por un prezo simbólico de 1 euro, co obxectivo de encher Pasarón e convertelo nun "inferno granate" para apoiar ao equipo.