A tenente de alcalde e concelleira de Protección Cidadá, Eva Villaverde, afirmou este mércores que a administración local ten como prioridade recuperar o edificio "canto antes" para retomar a programación cultural. O incidente saldouse con cinco feridos leves na zona do galiñeiro.
A edil do BNG evitou pronunciarse sobre o apoio á moción que o Partido Popular presentará no próximo Pleno municipal, previsto para o 27 de abril. Dita moción reclama unha reforma integral do inmoble. A data do pleno foi posposta a petición dos populares para asegurar a asistencia do seu portavoz, Rafa Domínguez, entre outros.
“"Fíxose con toda a axilidade e seguridade que cabía. Estanse a facer as cousas ben e seguiremos traballado no Teatro como se esteivo facendo nestes últimos tempos para deixalo como merece."
Villaverde destacou que a reconstrución do falso teito do Principal é unha actuación urxente na que participan tres empresas da cidade mediante contratos de emerxencia, cunha duración estimada de seis meses. A consultora Refuerza encárgase da inspección e definición do proxecto por 25.000 euros; Construcciones Ramírez executará a obra civil por 220.000 euros; e LAF Artec dirixirá os traballos e redactará o informe final.
Ademais, o Concello confirmou que esta intervención de emerxencia se executará en paralelo con outras reformas pendentes no edificio, como a mellora de tres baños, a instalación dun ascensor e a impermeabilización da terraza. Esta última obra, adxudicada a Construcciones Ramírez en xullo do ano pasado por 274.156,68 euros, tivo que ampliar o seu prazo de execución ata o 2 de febreiro de 2026 debido a atrasos. Non obstante, outras zonas como a sala de butacas non serán obxecto de reforma, a pesar das demandas da oposición.
