A maior parte das prazas, un total de 18, sairán a concurso por turno libre. Entre elas, destacan sete postos de policía local, dous de auxiliar administrativo, unha de administrativo, unha de subalterno, unha de arquitecto, unha de traballo social, unha de enxeñeiro de obras públicas, unha de oficial de Bombeiros, unha de oficial carpinteiro, unha de técnico medio de arquivos e unha de operario. Esta última praza de operario reservarase, por segunda vez na historia do Concello, para persoas con discapacidade intelectual.
Ademais, a convocatoria contempla dez postos por promoción interna: dous de técnico medio de xestión, unha de administrativo, dous de auxiliar, unha de enxeñeiro informático, un de sarxento de Bombeiros, unha de inspector de policía, un de oficial da Policía Local e outro de condutor mecánico do parque móbil municipal.
A oferta complétase con catro prazas de mobilidade horizontal para a Policía Local: dúas de axente municipal, unha de oficial e outra de inspector principal, cuberta esta última por mandato legal.
Como novidade, a nova oferta de emprego público incorporará por primeira vez a perspectiva de igualdade, aplicando criterios de discriminación positiva. As oposicións fallaranse a favor das mulleres en caso de empate técnico cun home, sempre que exista unha infrarrepresentación feminina no servizo municipal. As convocatorias tamén incluirán temario específico en materia de igualdade.
“"Estamos a facer un importante esforzo económico para presentar esta oferta de emprego público, convocando 32 prazas, que nos van permitir reforzar aquelas áreas dirixidas a mellorar os servizos á veciñanza, que é o noso principal obxectivo."
A alcaldesa accidental, Eva Villaverde, destacou o impacto laboral desta nova oferta, subliñando o esforzo económico realizado para reforzar as áreas que melloran os servizos á veciñanza, obxectivo principal do goberno local.
