Estas visitas, que forman parte da programación especial organizada polo Museo de Pontevedra con motivo do Día Internacional dos Museos, terán lugar os domingos 17, 24 e 31 de maio, e os días 7 e 14 de xuño. Cada sesión comezará ás 12.00 horas e estará limitada a un máximo de 20 persoas.

Para participar, será necesario realizar unha inscrición previa e gratuíta, que se poderá tramitar a partir do xoves 14 de maio ás 9.00 horas a través da páxina web do museo, museo.depo.gal. O percorrido, guiado polo equipo de Educación do museo, permitirá aos asistentes explorar a historia e evolución deste emblemático espazo no centro histórico pontevedrés.

Durante aproximadamente unha hora, os visitantes poderán coñecer lugares como a igrexa, o coro baixo, a sancristía e parte da horta do antigo convento. A actividade está deseñada para achegar ao público o valor histórico, artístico e patrimonial do recinto, aínda que non incluirá determinadas zonas como as dependencias conventuais, o xardín do claustro nin a área da horta afectada polas catas arqueolóxicas en curso.

O convento de Santa Clara, fundado no ano 1271, converteuse nun dos espazos patrimoniais máis destacados da cidade tras a súa incorporación ao Museo de Pontevedra como sétima sede. O complexo, que ocupa máis de 12.000 metros cadrados no centro urbano, foi fogar das monxas clarisas ata 2017. Foi adquirido polo Concello de Pontevedra en 2021 e cedido á Deputación en xaneiro de 2023 para a súa integración no museo, abrindo progresivamente á cidadanía con diversas actividades.