O premio, convocado polo Colexio Profesional de Xornalistas de Galicia en colaboración co Concello de Pontevedra, será entregado o vindeiro sábado 9 de maio nun acto que terá lugar na Casa Consistorial da cidade do Lérez.
A sala de prensa do Concello de Pontevedra acolleu o anuncio da candidatura gañadora. No evento estiveron presentes o alcalde Miguel Anxo Fernández Lores, a decana do Colexio de Xornalistas, Belén Regueira Leal, e o secretario do premio, Darío Janeiro Pereira.
“"Nun contexto tan complicado como o actual, necesitamos explicar como traballa o xornalismo e tamén as súas dificultades, presentes nas tres candidaturas desta edición."
A decana destacou que Precedo soubo “defender a dignidade e credibilidade do xornalismo que respecta os procedementos e a deontoloxía” fronte ao “cuestionamento da fiabilidade das testemuñas periodístícas”, o que “supón tamén defender o dereito da sociedade a estar informada”. O Colexio de Xornalistas subliña a importancia do traballo dos profesionais en zonas de conflito, pero tamén as dificultades que afronta o xornalismo en ámbitos máis próximos, cando intereses públicos ou empresariais impiden unha información contextualizada e crítica.
José Precedo iniciou a súa traxectoria profesional en Galicia, traballando na Cadena Ser e posteriormente en El País. Consolidouse como un referente no xornalismo político e de investigación en España, especialmente a través do seu labor en elDiario.es, onde asinou e coordinou investigacións de gran impacto relacionadas coa Comunidade de Madrid e o goberno de Isabel Díaz Ayuso.
“"Mais se hai un episodio recente que simboliza de maneira especialmente clara o compromiso de José Precedo coa liberdade de prensa e coa boa praxe xornalística, é a súa actuación no contexto do procedemento xudicial no que se investigou ao Fiscal Xeral do Estado e no que o Tribunal Supremo chamou a declarar a profesionais da información."
Nese contexto, Precedo defendeu con firmeza principios esenciais do oficio, como o dereito á confidencialidade das fontes e a independencia do xornalismo fronte a instrumentalización xudicial. O premio, sen dotación económica, consiste nunha imaxe dun fotoxornalista galego, que nesta edición será obra de Mercedes Moralejo.
