Os feitos tiveron lugar nas proximidades dunha oficina de CaixaBank, cando a policía recibiu un aviso inicial sobre unha pelexa entre tres mozos. Ao chegar ao lugar, unha patrulla localizou a un home co rostro ensanguentado, quen relatou que fora abordado por dous individuos que, sen mediar palabra, o agrediron e lle arrincaron unha cadea de ouro valorada nuns 300 euros.
Os axentes informaron á vítima dos seus dereitos e tomaron declaración a unha testemuña, que só puido achegar unha descrición parcial dun dos implicados. Tras unha batida pola zona, identificáronse varios mozos nun local próximo, pero foron descartados como sospeitosos ao non presentar signos compatibles coa agresión. A investigación segue aberta para identificar os autores do suceso, que tamén foi comunicado á Garda Civil.
“"Este suceso constitúe unha proba máis do problema de seguridade que está comezando a percibirse no municipio."
O roubo produciuse na tarde do domingo de Semana Santa, un período no que a Policía de Poio recuperara o segundo turno, que non se puidera desenvolver desde outubro de 2024 por falta de persoal. O sindicato CSIF subliñou que este incidente, ocorrido a plena luz do día (arredor das 17:00 horas) nunha das avenidas máis transitadas de Poio, evidencia a insuficiencia de medios humanos para garantir unha presenza policial efectiva no municipio.
Segundo o CSIF, con só unha patrulla operativa, resulta case imposible despregar un dispositivo de busca eficaz mentres se atende á vítima e se realizan as primeiras dilixencias. Advirten que a falta de presenza policial durante o turno de tarde ou a existencia dun único axente de servizo pode favorecer unha sensación de impunidade e limitar a capacidade de prevención e reacción ante delitos. Recentemente, incorporáronse dous auxiliares e un axente que estaba de baixa, elevando o número de efectivos a doce, dos cales dous están fóra de servizo por cuestións médicas.
