Os traballos de pavimentación dunha pista de 700 metros de lonxitude, que abarca unha superficie de 5.660 metros cadrados, atópanse en plena execución para mellorar o acceso ao novo campo de fútbol e á área recreativa de Salcedo. A intervención foi supervisada polo alcalde, Miguel Anxo Fernández Lores, e a concelleira do Rural, María José Abilleira.
Os terreos sobre os que se executa a mellora do firme foron cedidos de xeito gratuíto e indefinido ao Concello pola Comunidade de Montes Veciñais en Man Común de Salcedo. O obxectivo é optimizar a seguridade viaria e a funcionalidade do acceso a estas instalacións.
O alcalde Fernández Lores amosou a súa satisfacción polo proxecto, destacando que a obra dota á parroquia dun "acceso digno". Agradeceu tamén a implicación da Comunidade de Montes, que cedeu os terreos onde antes se situaba o campo de tiro da Brilat, e recomendou a visita á zona, situada a tres quilómetros da cidade.
Esta pavimentación inclúese dentro do macrocontrato municipal de rehabilitación de firmes, cun investimento total de 4.444.436 euros para actuar en case 40 quilómetros de estradas. O lote adxudicado á empresa COVSA por 1.124.685 euros abranxe 46 actuacións de pavimentación nas 15 parroquias do rural, incluíndo a renovación da sinalización e a colocación de redutores de velocidade.
O campo de fútbol de Salcedo, cunha superficie de 37.537 metros cadrados cedidos pola Comunidade de Montes, conta cun campo de herba artificial homologable pola FIFA (100x58 metros). O recinto complétase con vestiarios, enfermaría, cantina, almacéns e un espazo adaptado para bicicletas. Ademais, o complexo de lecer inclúe unha aula da natureza, parque infantil e zonas de estancia.
