A celebración da proba de tríatlon na cidade de Pontevedra implica o bloqueo de diversos accesos e zonas de aparcamento habituais para os afeccionados. Ante esta situación, o club granate mantén comunicación constante cos responsables da organización para deseñar un plan que permita a chegada dos seguidores ao estadio sen interferir no desenvolvemento da competición mundialista.
O club solicitara previamente á RFEF o cambio de data do encontro fronte á Ponferradina, previsto para este domingo ás 18:15 horas, ao ser informados polo Concello de Pontevedra sobre as restricións de tráfico na contorna. Con todo, a federación declinou a petición, polo que a entidade deportiva optou por descartar a suspensión para evitar prexuízos derivados dunha posible reubicación imposta.
Entre os puntos clave da xestión atópase a entrada de árbitros, medios de comunicación e o autobús do equipo visitante, que non poderá acceder á zona do garaxe debido ao percorrido da proba ciclista e a pé. O club espera ultimar nas próximas horas o plan definitivo, que incluirá recomendacións específicas para os asistentes.
