O edil de Facenda, Raimundo González, presentou unha modificación de crédito cualificada como "simple e completa", destacando a boa saúde financeira do municipio, que manterá máis de 12,8 millóns de euros en tesourería tras a operación.
O portavoz municipal do PSOE, Iván Puentes, subliñou a aposta do seu grupo polo diálogo e o realismo, priorizando proxectos "executables durante o que falta de mandato" fronte a iniciativas máis estratéxicas. "Os proxectos que solicitamos responden a demandas moi prácticas que recollemos da veciñanza", indicou.
Entre as actuacións negociadas inclúense obras para rematar coas inundacións na rúa do Santo, a redacción dun plan de mobilidade para a rúa Cruz Gallástegui, a posta en valor do Enil do río dos Gafos e a senda do rego de Valdecorvos, e axudas á Coral Polifónica de Pontevedra.
Tamén se contemplan a finalización da reforma do parque de Pasarón co conxunto escultórico dedicado a Cholo e á xeración do ‘Hai que Roelo’, a optimización da drenaxe do terreo de xogo de Pasarón (cunha partida de 563.000 €), a instalación de novos vídeo marcadores e megafonía no estadio, e a adquisición dun transformador de Fenosa en Mollavao (270.000 €) para convertelo en centro social.
A modificación orzamentaria, que ascende a 12.660.574,64 euros, finánciase "fundamentalmente e unicamente" co Remanente Líquido de Tesourería (RLT), o que reflicte a "boa saúde económica e financeira" da administración local.
O bloque central do gasto destinarase á área investidora, con preto de 6 millóns de euros. Destacan a adquisición de terreos (2.650.000 €), o saneamento do Gafos na zona da estación de autobuses (752.000 €), obras de urxencia no Teatro Principal (552.000 €) e actuacións no Mercado de Abastos (514.000 €).
Refórzanse tamén partidas para impulsar a actividade económica, cultural e de promoción. No ámbito deportivo, créase unha nova liña de subvencións para clubs con 330.000 euros, ademais de convenios con entidades como a Sociedad Gimnástica de Pontevedra (56.000 €) e o apoio a diversos torneos e clubs de piragüismo.
A modificación inclúe case 1,5 millóns de euros para abonar á Xunta de Galicia polo canon de saneamento, derivado dunha nova taxa autonómica.
Raimundo González trasladou a proposta ao PP antes da rolda de prensa, confiado en obter o seu voto favorable, xa que moitas cuestións xa foran debatidas e contaban con acordo previo.
Pola súa banda, Iván Puentes amosou escepticismo sobre o voto favorable do PP, instando a Rafa Domínguez a explicar "que obras non comparten" e "por que votan en contra" de proxectos como a resolución de inundacións na rúa do Santo ou as subvencións a clubs deportivos.
A proposta debaterase mañá na comisión de contas e a súa aprobación definitiva será nun pleno extraordinario o vindeiro venres, 7 de agosto.
