Un estudo do portal inmobiliario Idealista, baseado en datos de novembro de 2025, sinala que o 5% das vivendas na cidade de Pontevedra non dispón de sistemas de calefacción. A nivel provincial, esta porcentaxe elévase ao 13%.
Pontevedra sitúase como a segunda provincia galega con maior número de vivendas sen climatización, só por detrás da Coruña (15%). Ourense e Lugo rexistran os índices máis baixos, cun 9% cada unha.
Se se atende ás capitais de provincia, Pontevedra é a que presenta un menor número de inmobles sen calefacción (5%), seguida por Lugo (6%), Ourense (9%) e A Coruña (14%).
A nivel estatal, o informe indica que unha de cada catro vivendas españolas carece destas instalacións. As zonas máis cálidas, como as Illas Canarias (Santa Cruz de Tenerife 89%, Las Palmas 86%) e provincias como Cádiz, Huelva (54%), Murcia e Almería (50%), presentan maior porcentaxe de fogares sen calefacción.
En contraste, as rexións do norte, tradicionalmente máis frías, mostran os menores índices de vivendas sen climatizar, con porcentaxes baixos en provincias como Soria, Salamanca ou Navarra (4%).
Datos do Instituto Nacional de Estadística (INE) de 2024 suxiren que o 15,7% dos fogares españois non ten fonte de calor, vinculando esta circunstancia a niveis de renda baixos (25,5% fronte ao 7% en rendas altas).
Os fogares con menores ingresos dependen máis da electricidade (32,1%) e sofren pobreza enerxética, mentres que nos de mellor situación económica, o gas domina (49,6%).
A Organización de Consumidores y Usuarios (OCU) ofrece consellos para un uso eficiente da calefacción, como axustar a temperatura por estancia, apagar o sistema ao saír de casa, ventilar correctamente, purgar radiadores e instalar termostatos programables.
