A titulación presencial de Dirección e Xestión Pública, que ofertaba 20 prazas, completou todas as súas vacantes na convocatoria ordinaria, cunha nota de corte de 5,518. Esta é a primeira vez nos últimos seis anos que o grao esgota as súas prazas nesta fase. As persoas convocadas deberán formalizar a súa matrícula entre o 22 e o 23 de xullo.
O decano en funcións da Facultade de Dirección e Xestión Pública, Enrique Varela, explicou que xa tiveran tres solicitudes por riba do límite no primeiro chamamento, pero agardaron por un pacto coa delegada da CiUG en Vigo tras o segundo chamamento. Destacou que este ano se cubriu "antes que ningún outro dos seis anos anteriores", remontándose ao curso 2020-2021, e ademais con maioría de primeiras opcións e notas de corte máis altas.
Varela sinalou que están "avanzando na consolidación da captación do Grao DXP na modalidade presencial con máis xente nova, máis orientados aos nosos estudos e cada curso, con maiores notas de corte", o que atribúe ao "traballo feito cos colegas do Decanato DXP".
Actualmente, trabállase na captación de alumnado virtual, que adoita ser de profesionais do sector público. A previsión é que esta modalidade se peche "antes do fin de xullo e durante a derradeira convocatoria ordinaria", cualificando o resultado de "exitazo froito do traballo e da implicación de todo o equipo DXP".
No campus de Pontevedra, só quedarían abertos os graos de Belas Artes (nota de corte de 5) e Enxeñería Forestal (5,222), que adoitan quedar pendentes para a convocatoria extraordinaria. O ano pasado, o grao DXP tamén se pechou en décimo lugar, pero na convocatoria extraordinaria.
O curso pasado, tras non completarse ningunha titulación no primeiro chamamento, no segundo pechouse o 69% das titulacións do campus, incluíndo Ciencias da Actividade Física e do Deporte, Comunicación Audiovisual, Educación Infantil e Primaria, Enfermería, Fisioterapia, Publicidade e Relacións Públicas, Deseño e o dobre grao de Comunicación Audiovisual e Publicidade e RR PP.
