A Deputación de Pontevedra achegará 560.000 euros para financiar ao 100% a reforma da nave da música de Barro e a humanización da súa contorna. O acordo foi selado polo presidente provincial, Luis López, e o alcalde do municipio, Xosé Manuel Fernández Abraldes, no Pazo Provincial.
Esta actuación enmárcase na segunda convocatoria do Plan Provincia Extraordinaria – Plan Extra, que reparte 35 millóns de euros entre 57 concellos de menos de 50.000 habitantes da provincia. A achega provincial divídese en 476.000€ do Plan Extra e 84.000€ procedentes do Plan +Provincia.
A nave da música, concibida inicialmente como almacén, presenta condicións acústicas e lumínicas deficientes. A proposta de reforma inclúe a reubicación do auditorio no centro, a concentración de aulas e aseos nos laterais, e a transformación do espazo de chegada nunha área de relación social con posibilidade de concertos ao aire libre. Tamén se mellorará o illamento térmico e acústico.
Luis López destacou a aposta polos concellos pequenos e medianos, afirmando que "Somos a Deputación de todos os concellos". Pola súa banda, Fernández Abraldes expresou o seu agradecemento polo apoio económico da Deputación, que "está a ter en conta aos concellos da provincia, especialmente aos pequenos".
Esta colaboración súmase aos máis de 3 millóns de euros recibidos polo Concello de Barro nos últimos tres anos a través de distintos plans de cooperación, ademais doutras iniciativas conxuntas como a xestión do viveiro de empresas no polígono de Barro-Meis.
