O incidente tivo lugar arredor das 18:00 horas na rúa Eduardo Pondal, cando unha patrulla acudiu para asistir nun accidente de tráfico. Os axentes estaban a colaborar na redacción dun parte amistoso entre as partes implicadas no sinistro.
Durante as entrevistas cos implicados, os efectivos policiais decatáronse de que un dos condutores presentaba signos evidentes de embriaguez. Ao realizarlle a proba de alcoholemia, o resultado foi de 0,86 mg/l, superando amplamente a taxa permitida.
“"Cando lle comunicaron ese resultado, adoptou unha actitude agresiva: intentou romper o ticket impreso polo etilómetro, chegando a metelo na boca, e acto seguido lanzouse ao chan, golpeándose no nariz."
Posteriormente, cando os axentes intentaron axudalo a incorporarse, o condutor comezou a forcexar, propinándolle varios puñazos a un dos policías e aferrándose ás súas pernas coa intención de derrubalo. Ante esta situación, a Policía Local procedeu á súa detención.
O condutor enfróntase agora a cargos por agresión a un axente da autoridade e por un presunto delito contra a seguridade viaria, na modalidade de condución baixo a influencia de bebidas alcohólicas.
