O presidente da Deputación de Pontevedra, Luis López, anunciou a aprobación das axudas do Plan +Xuventude, que apoiarán a posta en marcha de iniciativas sociais por parte de 27 colectivos xuvenís de 17 concellos da provincia. Esta terceira convocatoria supón un incremento do 23% no número de entidades beneficiadas e dun 15% nos recursos económicos respecto á anterior, cando se achegaron 100.000 euros a 22 colectivos.
Segundo sinalou López, estes fondos impulsarán "charlas sobre economía, actividades culturais e deportivas, un campamento xuvenil, e moitas outras actividades nas que tamén salienta o apego polo territorio e polo rural da provincia". As comarcas de Deza e Tabeirós-Terra de Montes recibirán 13.000 € para colectivos de Agolada, Silleda e Forcarei. No Salnés, máis de 18.000 € distribuiranse entre Ribadumia, Sanxenxo, Vilagarcía de Arousa e Vilanova de Arousa.
Na comarca de Pontevedra, as axudas achegaranse aos 47.000 € para colectivos de Barro e Pontevedra. A cidade de Vigo recibirá 25.000 € para cinco colectivos, mentres que as comarcas do sur da provincia, incluíndo A Guarda, Nigrán, Ponteareas, Redondela, O Rosal, Salvaterra de Miño e Tui, repartiranse máis de 77.000 €.
Luis López asegurou que a Deputación "continuamos traballando a prol da xuventude da provincia, cunha aposta decidida por permitirlles ás mozas e mozos desta provincia que teñan en Pontevedra unha provincia próspera onde desenvolver os seus proxectos de vida". Engadiu que estas accións son "necesarias para poder facerlle fronte ao reto demográfico que atravesa esta provincia".
As axudas están destinadas a asociacións xuvenís e grupos sen ánimo de lucro, formados por entre tres e oito persoas de 18 a 35 anos, que presenten proxectos de interese social. As propostas poden abarcar áreas como a saúde, o benestar, a cultura, a ciencia, a participación xuvenil, o desenvolvemento rural, o reto demográfico e a protección ambiental. As entidades poden recibir ata un máximo de 5.000 euros por proxecto.
