O vicepresidente da Deputación, Rafa Domínguez, confirmou en rolda de prensa que a institución provincial achegará 160.000 euros para sufragar a metade do custo da reforma do céspede do estadio de Pasarón. Domínguez asegurou que, se o importe final da actuación fose superior, a Deputación comprométese a cubrir a metade do total.
Domínguez sinalou que o 50% restante será asumido polo Concello de Pontevedra, ao ser este o responsable do mantemento e mellora da instalación municipal. Subliñou que a Deputación é a administración que máis apoio presta ao Pontevedra CF, cun convenio anual de 160.000 euros, ademais desta achega extraordinaria para o céspede.
O vicepresidente cualificou de "non aceptable" o estado actual do céspede, argumentando que "un club e unha cidade que queren ascender ao fútbol de elite non pode ter un céspede de rexional". Explicou que se mantiveron comunicacións co club para coñecer as súas necesidades e buscar a mellor solución.
Estes 160.000 euros, que se aprobarán no próximo pleno da Deputación, son independentes do convenio anual entre a Deputación e o Concello de Pontevedra, que ascende a 2,5 millóns de euros. Domínguez adiantou que será necesario asinar un novo convenio para adxudicar esta cantidade e recordou outras achegas extraordinarias da Deputación ao Concello, como os 300.000 euros para os Premios Feroz ou os 100.000 euros para o tríatlon.
Ademais, a Deputación de Pontevedra instalará unha gran pantalla na Alameda para seguir a final do Campionato do Mundo de fútbol. Domínguez explicou que a localización se cambiou respecto á semifinal por "cuestións de seguridade", xa que a explanada de Montero Ríos podería colapsar. Estase a estudar co Concello o mellor lugar para a final, garantindo a seguridade.
