A escaseza de auga nos mananciais que abastecen os depósitos de Samieira e Pomar obriga a Viaqua a implementar cortes no subministro. Segundo informou o Concello de Poio, as restricións afectarán principalmente en horario nocturno, dende as 00:00 ata as 08:00 horas.
A medida afecta á totalidade de Samieira e a todas as zonas altas de Raxó. A imposibilidade de abastecer estas áreas dende o depósito de Albar, debido á diferenza de cota, xustifica a necesidade destes cortes.
O obxectivo destes cortes é recuperar a maior cantidade posible de auga para poder garantir posteriormente o abastecemento nas zonas afectadas. O Concello tamén sinala que a reapertura da auga debe ser progresiva para evitar roturas nas tubaxes pola presión do aire, o que require realizar purgas.
Ademais, sublíñase que o esforzo de almacenamento pode verse prexudicado se, unha vez restablecido o servizo, algún veciño realiza un consumo desproporcionado, afectando ao conxunto dos usuarios.
O Concello de Poio advirte que outras zonas do municipio poderían verse afectadas se a situación persiste e non se producen precipitacións. Piden desculpas aos veciños polos cortes e fan un chamamento a un consumo responsable.
