A Comisión extraordinaria de dinamización social e benestar social aprobou o convenio de colaboración entre o Concello e a Federación de Asociacións de Nais e Pais de Alumnos (FANPA). A proposta saíu adiante con seis votos favorables do BNG e PSOE, e dúas abstencións do Partido Popular.
A subvención, que se estenderá dende 2026 ata 2030, conta cun orzamento total de 456.776,72 euros. O obxectivo é asegurar o funcionamento das ludotecas de verán e Nadal, servizos clave para a conciliación da vida familiar e laboral na cidade.
Unha das novidades é a inclusión dun incremento anual acumulativo do 2,5 por cento. Este axuste busca solucionar o problema de desactualización das contías fixas do convenio anterior debido á inflación, proporcionando maior estabilidade financeira á FANPA para a contratación de persoal e a adquisición de materiais.
“"A FANPA realiza un labor excelente. Estas ludotecas, tanto as de verán como as de Nadal, son un recurso case imprescindible para as familias de Pontevedra. Coa ampliación a catro anos e a inxección orzamentaria anual protexemos este servizo contra as tensións inflacionistas e garantimos que a federación poida traballar con total solvencia e estabilidade."
O programa estrutúrase en dous bloques: as Escolas de verán (Ludoverán), que se desenvolverán en xullo e agosto en dez centros educativos públicos (cinco no rural e cinco no urbano, incluíndo obrigatoriamente Monte Porreiro), con previsión de atender a 1.200 nenos e nenas de 3 a 12 anos (nove en galego e unha en inglés); e as Escolas de Nadal (Ludonadal), durante as vacacións de Nadal en dous centros públicos, con cobertura para un mínimo de 150 prazas (unha en galego e outra en inglés).
Para acceder ás prazas gratuítas, é requisito estar empadroado en Pontevedra. Priorizaranse os alumnos de colexios públicos, seguido de familias con ambos proxenitores traballando, familias numerosas e, cun 10% reservado, menores derivados polos Servizos Sociais municipais.
