O Pazo Provincial acolleu a presentación oficial do circuíto 'Entre Pontes Trail & Running', unha proposta de turismo activo e deporte ao aire libre promovida pola Deputación de Pontevedra en colaboración cos concellos implicados.
A iniciativa combina tres carreiras urbanas de dez quilómetros e tres trails de 14 quilómetros, co obxectivo de descentralizar eventos deportivos, desestacionalizar o turismo e promover hábitos de vida saudable. Cada xornada será gratuíta e espera reunir a 800 persoas, ademais de incluír andainas populares, carreiras infantís e un espazo gastronómico con food trucks.
“"Somos a provincia do deporte"
O calendario comezará o 20 de setembro cunha proba de dez quilómetros entre a ponte de acceso a A Illa de Arousa e o porto de Vilanova de Arousa. Continuará en Vigo o 12 de outubro cun trail de 14 km, seguido por Gondomar o 25 de outubro cunha carreira urbana de dez km, e Cerdedo-Cotobade o 1 de novembro cunha cita de montaña de 14 km.
A recta final do circuíto chegará á cidade de Pontevedra o 22 de novembro cunha proba de dez km, e clausurarase o 29 de novembro en Moaña co último trail. Toda a información e inscricións estarán dispoñibles en depo.gal.
O presidente da Deputación, Luis López, destacou o progreso desde a súa chegada ao goberno hai tres anos, baseando o apoio ao deporte en catro piares: deportistas, clubs, eventos de carácter internacional e nacional, e transformación de instalacións.
Pola súa banda, a vicepresidenta Luisa Sánchez sinalou que o circuíto busca achegar o deporte ao territorio e descubrir a provincia a través do trail e da carreira, agradecendo a colaboración dos concellos e deputados implicados.
