A presentación tivo lugar este mércores na súa facultade, marcando o inicio da carreira electoral na institución académica. Jacobo Porteiro, líder de ConSenso, eloxiou a Cancela como un "candidato solvente e con experiencia", destacando a súa visión clara para o Campus de Pontevedra desde o comezo da súa andaina.
“"Pontevedra é un campus fermosísimo. Hai potencial por explorar e crecer. A UVigo non se pode entender sen a cidade nin a cidade de Pontevedra pode entenderse sen o campus, polo tanto quería alguén solvente con experiencia e, pola miña relación xa previa con el, tiña claro que Chema é un boísimo candidato para representalo, para coordinalo e para reimaxinar a UVigo."
Pola súa banda, Chema Cancela expresou que asume esta proposta como "unha grande responsabilidade que acepto con ilusión e ganas de traballar". Subliñou que o Campus de Pontevedra representa a súa orixe como docente e investigador, e que posúe un gran potencial que require un liderado desde diversas perspectivas para desenvolver as súas áreas de coñecemento.
O aspirante a vicerreitor recalcou a súa intención de "fortalecer a vinculación da cidade coa universidade", propoñendo a incorporación de zonas de traballo conxunto e participación. Entre as súas medidas, Cancela busca outorgar máis peso ao Programa Universitario de Maiores e "respaldar o traballo que as delegacións de alumnos fan fortalecendo as competencias profesionais dos sectores vinculados ás titulacións que se imparten neste campus".
Un campus máis vivo é un campus máis importante.
Para acadar os seus obxectivos, Cancela comprométese a achegar a súa experiencia, traballo e esforzo, en prol dunha alta calidade na docencia, investigación necesaria e transferencia con impacto social. A carreira electoral da UVigo comeza oficialmente este venres coa presentación das tres candidaturas na Facultade de Filoloxía do Campus de Vigo.
