O municipio de Cerdedo-Cotobade incrementará a súa oferta de vivenda pública coa rehabilitación de dous inmobles situados en San Pedro de Parada. Estas actuacións buscan non só recuperar patrimonio construído, senón tamén aumentar a dispoñibilidade residencial para aluguer accesible co fin de fixar poboación.
A iniciativa conta co apoio financeiro da Xunta de Galicia, a través dun convenio asinado entre o alcalde, Jorge Cubela, e a conselleira de Vivenda e Planificación de Infraestruturas, María Martínez Allegue. O acordo inclúe un préstamo de arredor de 75.000 euros sen intereses, procedente do Fondo de Cooperación da Xunta, destinado á rehabilitación de patrimonio construído en concellos de menos de 50.000 habitantes.
Ademais da rehabilitación destas dúas vivendas, o convenio tamén permitirá ao Concello de Cerdedo-Cotobade desenvolver o proxecto básico e de execución para un futuro chiringuito na zona dos baños de San Xusto, en San Xurxo. Esta actuación enmárcase tamén dentro dun programa autonómico.
O Concello xa dispón dunha carteira de vivendas de protección, que inclúe pisos en Carballedo, vivendas de madeira en Viascón e as Casas dos Mestres de Cerdedo. Destas, só as de Carballedo dependen de bases aprobadas polo propio Concello.
