Este proxecto, que representa un investimento superior aos 450.000 euros, atópase na súa fase final de execución. Xa se completou a tabiquería, a carpintería exterior e interior, e as instalacións de subministracións, mentres se procede á montaxe do mobiliario de cociña e baños.
O Centro Santa Ana será un piar fundamental na rede de intervención de Cáritas Diocesana de Santiago na área de Pontevedra. A iniciativa busca ofrecer un espazo seguro e de apoio para que as mulleres poidan reconstruír as súas vidas.
O novo centro contará con 8 habitacións con baño propio (7 individuais e 1 dobre adaptada), ademais de espazos comúns para a convivencia e o acompañamento. Con 270 m² construídos, integrarase nun complexo de máis de 1.300 m² de uso socioasistencial xa operativo, enfocado a procesos de inclusión máis estables.
“"Este centro non só amplía a nosa rede de atención, senón que crea un espazo onde as mulleres poden reconstruír a súa vida con apoio próximo e continuado. É un paso decisivo para que a inclusión social deixe de ser unha emerxencia puntual e se converta nun proxecto sostible e transformador."
O proxecto recibiu o apoio da Fundación Rey Balduino con Cáritas Española, así como de Ence, que achegou 15.000 euros, e recentemente sumouse Caixa Rural cunha contribución de 3.000 euros. Estas achegas son cruciais para a viabilidade dun recurso deseñado para ofrecer respostas duradeiras a mulleres en situación de exclusión ou sen recursos.
Este centro representa a terceira fase dun proxecto de transformación social en Pontevedra, que xa inclúe o Albergue San Javier e o Centro de Atención Continuada San Roque. Con estes recursos, Cáritas consolida unha rede que combina acollida, acompañamento e apoio continuado para a inclusión social.
