O dispositivo de procura activouse sobre as 16:17 horas cando o home, veciño do municipio e de 43 anos, acudiu á vivenda da súa exparella. Alí produciuse un altercado no que, segundo as fontes, agrediu á muller antes de emprender a fuxida polos camiños da contorna, levando consigo ao bebé.
As primeiras actuacións policiais permitiron localizar ao menor, que se atopaba en bo estado e sen danos aparentes, preto dun cruce de camiños no tramo rural do pobo. O neno foi atopado sobre as 19:00 horas, máis de dúas horas e media despois da fuxida, e quedou ao cargo dun familiar.
A muller agredida foi trasladada a un centro hospitalario para ser valorada polas lesións sufridas, recibindo a alta médica horas despois. O agresor, ademais, tiña unha orde de procura e captura por non presentarse para o seu ingreso en prisión, ao estar condenado en firme.
No operativo de busca participaron oito patrullas da Garda Civil, incluíndo efectivos de seguridade cidadá e do Seprona, dado que a zona de fuxida é monte. Sumáronse tamén un helicóptero, drones e cans de rastreo. A intensidade do dispositivo reduciuse coa noite, pero mantense activo dada a consideración dos feitos como unha agresión machista inscrita no sistema VioGén.
