A nova obra de Arantza Portabales, Asasinato no muíño do cura, editada por Galaxia en galego e por Lumen en castelán, chega ás librarías este xoves 9 de abril. A novela, segunda entrega da serie protagonizada polos investigadores Iria Santaclara e César Araújo, introduce a Alba Mariño, unha muller que busca respostas sobre o seu pasado en Loeiro, a Loira da ficción, e en lugares como Marín, Bueu e Pontevedra.

A trama, que se desenvolve entre o presente e un pasado oculto, aborda a violencia desde unha perspectiva social. Portabales sinala que, aínda que hai momentos puntuais de gran violencia, o seu interese principal reside en como os acontecementos extremos alteran o statu quo e revelan a verdadeira natureza das persoas. A autora compara a brutalidade inicial da novela cunha “matanza do porco”, unha tradición moi arraigada que a impactou na súa infancia en Donosti.

A novela tamén explora a opresión social que sufrían as mulleres nas aldeas galegas hai 50 anos, cunha sociedade machista que xulgaba duramente a quen vivía fóra das normas. A escritora destaca que Loeiro se volve un espazo claustrofóbico para as tres mulleres protagonistas, as netas do cura, que deben enfrontarse ao mundo e ás súas propias decisións. A memoria e a identidade son outros temas centrais, reflectidos na busca de Alba Mariño por coñecer a súa propia historia.

Ademais, Portabales revela que a novela ten conexións coa súa propia historia familiar, especialmente coa súa avoa, neta do cura de Ardán. A autora tamén inclúe referencias a lugares da súa infancia no País Vasco, como Pasajes de San Juan e Zurriola. A presentación oficial do libro terá lugar o venres 10 de abril na librería Cronopios de Pontevedra, ás 19:30 horas, nunha conversa coa xornalista Susana Pedreira.