A Deputación de Pontevedra, a través da Estación Fitopatolóxica do Areeiro, destaca o bo estado sanitario xeral da uva na provincia, a pesar de casos puntuais de mildio larvado e novas manchas nas follas. Os técnicos lembran a importancia dos labores culturais para reducir tratamentos.
Ante a previsión de choivas, non se agardan danos directos, senón beneficios como o lavado dos acios ou a contención da acidez. Non obstante, nos predios con mildio larvado, a vixilancia é crucial pola alta carga de esporanxios no ambiente, que aumentará coa humidade.
En canto ao oídio, mantense a vixilancia e os labores culturais de eliminación de follas e netos, xa que as condicións meteorolóxicas son favorables. As choivas poderían xerar síntomas de botrite en acios con rachos fisiolóxicos, feridas por eirugas ou danos por aves ou avespas. A pel da uva podería inchar e rachar se as precipitacións son intensas.
Respecto ás avelaíñas do acio, non se detectaron machos de Lobesia botrana nin de Eupoecilia ambiguella. Atopouse un acio con eiruga e perforación. Si se detectaron adultos de Scaphoideus titanus, vector da flavescencia dourada, que busca refuxio para pór ovos. Recoméndase aplicar insecticidas naturais rexistrados e eliminar plantas afectadas con síntomas como follas reviradas, endurecidas ou amareladas.
Na nogueira, as capturas da mosca da casca verde da noz (Rhagoletis completa) son reducidas, pero xa hai noces afectadas con larvas. Aconséllase eliminar froitos afectados. Tamén se observa un incremento significativo da bolboreta do buxo (Cydalima perspectalis), polo que se recomenda tratar canto antes para evitar danos maiores ás plantas.
