A Universidade da Coruña celebrará o próximo xoves, 17 de setembro, unha nova edición de #OLAUDC, a Xornada de Benvida destinada a facilitar ao novo estudantado a integración á institución e achegarlle información sobre os servizos, actividades e recursos dispoñibles na universidade e na súa contorna.
A xornada desenvolverase de maneira simultánea no Estadio Universitario Mariña Dourada, no campus de Elviña da Coruña, e na Praza Central de Esteiro, en Ferrol, e dará comezo ás 11.00 horas. Participarán arredor de 70 stands, atendidos por persoal dos servizos, unidades e áreas da UDC, asociacións estudantís, centros de investigación, entidades colaboradoras de UDC Saudable e outras organizacións xuvenís.
Cada entidade presentará os seus obxectivos e funcións, así como a súa contribución á vida universitaria e á sociedade. Moitas desenvolverán actividades participativas e dinámicas lúdicas, como xogos e concursos tipo ‘Kahoot!’, para favorecer a interacción co alumnado.
Entre as propostas atópanse iniciativas de sensibilización sobre a prevención de cancro, voluntariado da Cruz Vermella, prevención de drogodependencias, nutrición, fibromialxia, endometriose, dereitos humanos ou diversidade LGTBI.
Ademais, a Dirección Xeral de Xuventude instalará unha mesa informativa para tramitar o Carné Xove, mentres que a asociación ADOS desprazará unha unidade móbil para promover a doazón de sangue e órganos.
O programa incluirá actividades exclusivas no campus da Coruña, como probas de tiro con arco, obradoiros de centros de investigación da UDC, mostra de material deportivo adaptado da Fundación ENKI, xogos e bolos da asociación FETSAC, e a presenza da Federación Galega de Fútbol. A asociación CUAC FM amenizará a xornada.
Ao chegar, cada estudante recibirá unha tarxeta que deberá selar en polo menos oito stands para recibir agasallos promocionais da UDC. Ao final da xornada, sortearanse 50 suadoiros da UDC (30 na Coruña e 20 en Ferrol) e tres caixas sorpresa con merchandising universitario.
A celebración rematará cunha sesión DJ da Duendeneta, de 14:00 a 16:00 horas en ambos campus, pondo o broche final a unha xornada deseñada para que o novo estudantado coñeza de primeira man a vida universitaria e as súas oportunidades de participación, formación e lecer.
