A Deputación de Pontevedra suma unha nova figura á súa estrutura coa incorporación de Agustín Reguera como director de Acción Municipal e Investimentos. Reguera, quen xa foi delegado territorial da Xunta en Pontevedra durante os últimos tres anos, achega unha ampla experiencia no ámbito municipalista, destacando os seus 28 anos como alcalde de Soutomaior e a súa presidencia na Federación Galega de Municipios e Provincias (Fegamp).

O presidente da Deputación, Luis López, destacou a valía de Reguera para o organismo provincial, afirmando que "coa incorporación de Agustín Reguera gaña a provincia porque é un gran valedor do municipalismo que porá todo o seu coñecemento e a toda a súa vontade para estreitar aínda máis as relacións da Deputación cos 61 concellos da provincia, é unha figura de referencia".

Dende a súa nova responsabilidade, Reguera deseñará estratexias para a captación e distribución de fondos entre os municipios pontevedreses. Tamén definirá políticas para o fortalecemento da administración local e ofrecerá asistencia aos servizos de Presidencia e Cooperación da Deputación, actuando como interlocutor principal cos concellos.

Este nomeamento enmárcase na aposta da Deputación por reforzar a cooperación cos municipios, un dos eixos fundamentais do goberno provincial. A chegada de Reguera supón a incorporación dunha figura clave no municipalismo da provincia de Pontevedra.