Nunha xornada celebrada no Salón de Plenos do Pazo Provincial, a institución destacou as oportunidades que a Unión Europea ofrece á mocidade en áreas como a mobilidade internacional, o acceso ao mercado laboral e a participación cidadá. O evento contou coa asistencia de preto de setenta profesionais do ámbito educativo, técnicos municipais de xuventude e representantes de asociacións xuvenís de diversos concellos da provincia.
A iniciativa, organizada en colaboración coa Fundación Galicia Europa, serviu para achegar aos participantes programas comunitarios como o Corpo Europeo de Solidariedade, DiscoverEU, Eures e o Diálogo da UE coa Xuventude. Tamén se presentaron propostas relacionadas co xornalismo e a participación xuvenil a escala europea.
“"O proxecto comunitario é un espazo de paz e liberdade."
Entre as iniciativas propias da Deputación, destacouse o programa Erasmus+, que o ano pasado mobilizou máis de 700.000 euros para facilitar prácticas laborais en países da Unión Europea a estudantes de formación profesional. A institución tamén subliñou o seu papel na captación e xestión de fondos europeos con impacto directo na mocidade.
Ademais, mencionáronse outras liñas de actuación como os Premios Provinciais á Xuventude, dotados con 36.000 euros, o Plan +Xuventude, cun orzamento de 120.000 euros, e programas como DepoEmprende ou +Emprega, dirixidos a fomentar o emprendemento e facilitar as primeiras experiencias laborais nos concellos de menor tamaño.
A xornada tamén serviu para visibilizar o convenio asinado esta semana entre a Deputación e a Consellería do Mar. Este acordo permitirá que estudantes do Instituto Galego de Formación en Acuicultura da Illa de Arousa realicen prácticas en empresas e institucións doutros países, especializándose en acuicultura ou mergullo profesional. O deputado responsable de Fondos Europeos, avanzou a intención de organizar novos talleres e encontros sobre recursos comunitarios para ampliar o apoio a mozos e profesionais interesados en programas europeos.
