O prazo para solicitar estas subvencións, destinadas a investimentos e á adquisición de equipamento, permanecerá aberto ata o vindeiro 30 de setembro. Cada entidade poderá recibir entre 5.000 e 15.000 euros para a execución de obras, e entre 1.000 e 5.000 euros para a compra de material deportivo.
A liña de execución de obras financiará gastos relacionados con investimentos en inmobles ou terreos propios, ou con dereito de uso por un mínimo de cinco anos, para melloras ou novas construcións de infraestruturas e instalacións. Tamén se poderán sufragar taxas de licenzas, gastos notariais e rexistrais.
Na liña de adquisición de equipamentos, o plan ProDeporte permitirá financiar bens deportivos ou non deportivos, sempre que sexan inventariables e estean relacionados coa práctica deportiva ou co funcionamento da entidade. O valor destes bens deberá ser a partir de 500 euros.
A Deputación de Pontevedra convoca estas axudas co obxectivo de promover valores como a participación, a cooperación, a competitividade e a inclusividade, ademais de fomentar hábitos de vida saudable na cidadanía. O apoio aos clubs busca mellorar as súas infraestruturas e medios materiais, contribuíndo ao desenvolvemento da súa actividade e á consolidación da práctica deportiva na provincia.
