As mariscadoras da Confraría Pedra da Oliveira de Vilaboa estiman que poderían estar dous anos sen actividade extractiva. Esta situación débese á crise de produción que xa viñan arrastrando e que se agravou cos temporais do pasado mes de febreiro, que provocaron unha devastación significativa nos bancos marisqueiros.
A secretaria da Lonxa de Vilaboa explicou que as mulleres da confraría xa optaran polo cese da actividade antes da chegada das fortes chuvias, debido ás "moi malas tallas" e á escasa presenza de ameixa apta para a venda. A pesar dos esforzos previos por limpar os ríos e evitar o exceso de auga doce, o impacto das crecidas foi demoledor.
“"Nunhas zonas perdemos case todo, noutras menos. Como media, temos case un 70% de perdas de ameixa. Berberecho xa case non había."
Aínda que a porcentaxe de perdas na ría de Vilaboa é menor que noutras zonas como a ría de Arousa, o resultado final non é mellor, xa que as existencias de marisco xa eran moi reducidas. A recuperación tras episodios de mortalidade anteriores, nos que se perdeu máis do 85% da ameixa, estaba sendo lenta, o que agrava a situación actual.
Moitas mariscadoras acolléronse ao cese da actividade en febreiro, o que lles permite acceder a seis meses de parón. Unha vez esgotado este período, poderán beneficiarse das axudas dos convenios propostos pola Xunta de Galicia, que prevén pagas de arredor de 700 euros por persoa. Durante este tempo, será necesario realizar sementeiras e limpar os limos para asegurar a supervivencia e o crecemento do marisco.
Representantes da Xunta de Galicia, incluída a directora xeral de Desenvolvemento Pesqueiro, visitaron a confraría para informar sobre as liñas de colaboración e as axudas dispoñibles. Tamén se repasaron investimentos recentes como a rexeneración de 16 hectáreas produtivas, o financiamento de sementeiras e a adquisición de maquinaria para limpezas, cunha solicitude de 110.000 euros actualmente en avaliación.
