A Ribeira Sacra ourensá será o escenario da quinta edición do Campionato de Tapas e Pinchos de Galicia, unha cita que busca realzar a identidade culinaria da comunidade e os seus produtos de proximidade. O evento, organizado pola Deputación de Ourense en colaboración con Turismo de Galicia, reunirá a preto de cincuenta profesionais da gastronomía.
O director de Turismo de Galicia, Xosé Merelles, destacou durante a presentación a importancia da gastronomía como "un dos grandes elementos esenciais da nosa proposta turística" e unha ferramenta clave para atraer visitantes interesados en coñecer o territorio a través dos seus sabores. Subliñou tamén como estas iniciativas combinan creación culinaria, tradición e innovación, permitindo ademais descubrir os produtos e recursos locais.
O Mosteiro de San Pedro de Rocas, un enclave con forte vinculación patrimonial e paisaxística, acollerá a competición. A elección deste espazo busca integrar a experiencia gastronómica coa riqueza histórica e natural da Ribeira Sacra, destacando a paisaxe, os viñedos e a tradición vitivinícola da zona.
Os participantes terán un máximo de quince minutos para elaborar e presentar as súas creacións ante un xurado que valorará o sabor, a técnica, a orixinalidade e o uso de produtos locais. A inscrición ao campionato é gratuíta e está aberta a través da web da Academia de la Tapa y del Pintxo de España.
