A resolución do Contencioso-administrativo deixa sen efecto o decreto da Alcaldía que formalizara o cesamento da traballadora do posto da Tesourería Xeral. Este fallo xudicial implica que o Concello de Ourense debe proceder á readmisión da empregada de forma inmediata, ademais de recoñecer o seu dereito a percibir todos os efectos económicos e administrativos correspondentes.
O goberno municipal anunciou a súa intención de recorrer esta sentenza ante o Tribunal Superior de Xustiza de Galicia (TSXG).
“"Esta sentenza é unha nova condena ao método DO, xa que deixa en evidencia que non había motivos técnicos senón persecución política."
O BNG, a través do seu portavoz Luis Seara, criticou a decisión do goberno local, afirmando que a política de persoal do alcalde Jácome se basea en "ameazas, acoso e intimidación a todas aquelas funcionarias e funcionarios que non se pregan aos seus intereses e se limitan a exercer con independencia o seu traballo". O grupo nacionalista solicitou que sexa o propio alcalde quen asuma as consecuencias económicas que as súas decisións, anuladas pola xustiza, teñen para as arcas municipais.
