Unha colisión con tres vehículos implicados rexistrada en Catoira saldouse con dúas persoas feridas. O sinistro tivo lugar sobre as 00:45 horas no quilómetro 11 da PO-548, e implicou unha colisión frontal. As dúas persoas feridas foron evacuadas ao Hospital do Salnés.
Ademais, outras dúas persoas resultaron lesionadas nunha saída de vía na OU-519, en Barbadás (Ourense). O accidente ocorreu ás 07:30 horas no quilómetro 4 desta estrada, en Piñor. Os dous ocupantes, que xa estaban fóra do vehículo cando chegaron os servizos de emerxencia, foron trasladados ao Complexo Hospitalario Universitario de Ourense (CHUO).
Finalmente, en Santa Comba (A Coruña), unha persoa tivo que ser liberada polos bombeiros tras envorcar o seu vehículo nunha cuneta na DP-2904, no quilómetro 17 en Montouto. O único implicado no accidente, que precisaba asistencia sanitaria, foi trasladado en ambulancia ao hospital de referencia.
Nos operativos de emerxencia colaboraron o 061, a Garda Civil, os Bombeiros de diferentes parques (Salnés, Polígono de San Cibrao das Viñas), o GES de Padrón, Protección Civil de Catoira, Valga e Barbadás, e os servizos de mantemento das estradas afectadas.
