A Escola de Enxeñaría Industrial da Universidade de Vigo conmemora este ano unha dobre efeméride: os 50 anos do inicio da actividade docente da Escola Técnica Superior de Enxeñeiros Industriais de Vigo (ETSII), e os 125 anos da creación da Escola de Artes e Industrias de Vigo, antecedente da Escola Universitaria de Enxeñaría Técnica Industrial (EUITI). Para celebrar estes aniversarios, a escola organizou un amplo programa conmemorativo para os días 20 e 24 de outubro, que reunirá a diferentes xeracións de profesionais formados no centro.
O director da escola, José Fariña, sinalou que o 20 de outubro de 1976 marcou o primeiro día de actividade docente da ETSII, dependente naquel momento da Universidade de Santiago de Compostela. Lembrou tamén que a Escola de Artes e Industrias de Vigo creouse o 25 de xaneiro de 1901, dando orixe á EUITI. A actual Escola de Enxeñería Industrial da Universidade de Vigo creouse en 2011 pola unión de ambos os centros. Fariña destacou que ambas as escolas representan unha mesma tradición formativa ligada á industria viguesa e que se estima que máis de 7000 persoas remataron os seus estudos nestes 50 anos.
A programación comezará o martes 20 de outubro cunha xornada dirixida a alumnado, PDI e egresados, que transformará a escola nunha viaxe no tempo aos anos 70. Incluirá aulas ambientadas na época, o uso de retroproyectores, unha emisión de radio en directo con entrevistas e música de época, e un concurso de vestimenta de época.
O sábado 24 de outubro celebrarase un gran reencontro de promocións. A xornada comezará coa recepción, exposición de orlas e fotografías históricas, e mesas de empresas. Haberá unha mesa redonda titulada 'Fixeron escola', na que profesorado xubilado e representantes empresariais compartirán lembranzas e reflexionarán sobre o futuro da enxeñaría. Tamén se presentará o libro do 50º aniversario, elaborado polo Observatorio de Persoas Egresadas, que recompila os fitos da historia da escola.
A escola, que na actualidade conta con 2765 estudantes (2500 de grao e 265 de máster), ofrece unha ducia de titulacións de grao e 10 másteres universitarios, mantendo a súa tradición formativa ligada ao tecido industrial de Vigo e Galicia.
