A Plataforma de Organizacións de Pacientes outorgou un novo galardón ao proxecto "Aprendendo a desaprender", impulsado polo área sanitaria de Ourense, Verín e Valdeorras. Esta iniciativa destaca por integrar a vivencia dos pacientes e das asociacións na formación dos profesionais sanitarios, co obxectivo de promover unha atención máis humana e participativa.
O premio foi recollido en Madrid por Esther Pérez, supervisora de Formación, e Belén Piñeiro, xefa do Servizo de Atención ao Paciente e Humanización. É a quinta edición destes recoñecementos, e supón a segunda insignia para esta área sanitaria ourensá.
Na categoría de Planificación, o proxecto foi valorado pola súa aposta por incorporar a visión dos pacientes no deseño, desenvolvemento e avaliación das estratexias formativas. A iniciativa xa forma parte da programación da Escola Universitaria de Enfermería de Ourense e da formación dos enfermeiros internos residentes, coa previsión de estenderse ao conxunto de profesionais sanitarios.
A filosofía de "Aprendendo a desaprender" baséase na idea de que a atención sanitaria debe ir máis aló dos coñecementos técnicos e científicos, incorporando a experiencia de quen convive coa enfermidade e utiliza os servizos. Deste xeito, foméntase unha asistencia máis próxima e centrada nas persoas.
Este recoñecemento chega poucas semanas despois de que o mesmo proxecto obtivese o primeiro premio nas IV Xornadas de Humanización da Asistencia Sanitaria do Sergas.
