A cidade de Ourense rozou este martes o seu teito térmico do verán, rexistrando 42,5 graos, a máxima de Galicia na xornada e a segunda máis alta do verán, só superada polos 42,62 graos do pasado 4 de xullo. Outras localidades como Arnoia (42,4 graos) e Leiro (42 graos) tamén experimentaron temperaturas extremas.
Este episodio prolonga un verán marcado por temperaturas extremas. Dende o inicio da estación, o 21 de xuño, Ourense superou os 40 graos en oito ocasións, e máis da metade dos días estivais rexistraron polo menos 35 graos. A localidade de Leiro xa marcou un récord histórico con 44,2 graos, combinando baixa altitude, efecto val e pouca renovación do aire.
O calor intenso tamén repercute no peto. Fontes do sector eléctrico estiman que o uso intensivo de aire acondicionado e ventiladores podería incrementar a factura eléctrica entre 25 e 40 euros. Facua sinala que o recibo regulado xa rexistrou un incremento do 17,3% interanual na primeira quincena de agosto.
Aínda que as altas temperaturas non están a provocar un aumento da presión asistencial segundo o Área Sanitaria de Ourense, Verín e Valdeorras, o sistema MoMo mantén en 14 as mortes atribuíbles ao calor na provincia. A situación obriga a alterar rutinas, buscando refuxio na sombra, auga ou centros comerciais.
A partir de hoxe, o episodio comezará a perder forza coa retirada do aire cálido procedente de África. Mantense o aviso amarelo por altas temperaturas no Miño de Ourense e Valdeorras, agardándose unha máxima de 36 graos na cidade. O descenso será máis acusado nos próximos días, con 27 graos o xoves e 26 o venres.
