O consumo de estupefacientes a plena luz do día, o enfrontamento e insulto a patrullas, a negativa a identificarse ou a portaxe de armas prohibidas como navallas ou puños americanos son algunhas das infraccións que máis sancións acumulan en Ourense. A Lei de Seguridade Cidadá, coñecida como "lei mordaza", cumpriu unha década e deixa un balance de 15.352 expedientes sancionadores na provincia, cun valor total de propostas de multas que roza os 8,6 millóns de euros.
O vocal no Consello da Policía Nacional polo SUP, Roberto González, sinala o consumo de drogas como un factor clave que complica o labor policial. Segundo explica, as substancias fan que as persoas "se desinhiban" e se mostren "máis agresivas" cara aos axentes, desatendendo requirimentos e provocando enfrontamentos que antes se resolvían coa simple presenza policial.
“"Hai que enmarcalo nun contexto de perda de autoridade en xeral na sociedade. Non pasa só na policía; pasa nos colexios ou nos centros sanitarios con agresións a profesionais. Sen embargo, no ámbito da Policía Nacional agrávase porque as nosas intervencións son, en moitas ocasións, con persoas baixo os efectos das drogas."
A tenencia e consumo de drogas na vía pública lidera o "top" de infraccións en Ourense, representando preto do 60% das denuncias ordinarias. Seguen as faltas de respecto cara aos axentes, con máis de 200 expedientes anuais, e a portaxe de armas prohibidas, que sumou preto de 190 expedientes en 2024.
A desobediencia e resistencia tamén rexistraron picos notables, especialmente durante a pandemia de 2020, cando as restricións dispararon os casos a 2.386 nun só ano. Cando a persoa non atende aos requirimentos policiais ou persiste na desobediencia, a actuación pode derivar en sanción administrativa ou mesmo detención por delito de resistencia, desobediencia ou atentado.
