Durante a súa intervención no Debate sobre o Estado do País, Ojea criticou a perspectiva "autocompracente" de Rueda, que, segundo el, non reflicte a realidade galega. O parlamentario do Grupo Mixto lamentou que o presidente definise Galicia como "o balcón do Atlántico", o que, na súa opinión, evidencia unha "visión discriminatoria" cara á provincia de Ourense, que considera "en pequeniño" nos plans do goberno autonómico.
“"Se non lle lembro eu que Ourense existe, quen vai ser?"
En materia de vivenda, Ojea sinalou que a provincia de Ourense é a que "ten programadas menos vivendas de promoción pública". Propuxo que a Xunta aproveite unha leira da súa titularidade en Bemposta para promover unhas 800 vivendas, superando as "complicacións de tipo xurídico" mediante a declaración de "proxecto de interese autonómico".
Ademais, o deputado ourensán instou á Xunta a finalizar a autovía AG-31 ata Portugal desde Celanova e a esixir a baixada do IVE dos produtos agropecuarios, tal como se fai co peixe. Tamén expresou preocupación polos incendios, lamentando que o Pladiga siga "pendente de aprobar" e advertindo sobre as consecuencias para Ourense e o Partido Popular se se repiten os lumes do verán pasado, xa que o 74% dos lugares de risco están na provincia.
No ámbito educativo, Armando Ojea solicitou que a administración autonómica asuma a competencia dos conserxes dos centros e que se abran os colexios para outras actividades. Finalmente, reiterou a súa demanda dun hospital "novo e digno" para Ourense, argumentando que as ampliacións xa non son suficientes e poñendo como exemplo o centro de saúde Olimpia de Vigo, que considera un modelo a seguir para a capital ourensá.
