O delegado da Xunta en Ourense, Manuel Pardo, participou na presentación do festival Xoldra de Aguiar, que terá lugar o vindeiro 19 de setembro no concello de Pereiro de Aguiar. O evento conta co patrocinio da Xunta a través de Turismo de Galicia, no marco dos Concertos do Xacobeo, e coa colaboración da Deputación Provincial de Ourense e do propio concello.
O principal obxectivo do festival é a posta en valor do rural, utilizando a cultura das festas populares como instrumento para dinamizar a xornada musical, que tamén incluirá unha programación infantil. O delegado destacou que esta iniciativa convida a veciños e visitantes a recuperar a figura das festas populares como punto de encontro.
“"A través do apoio a iniciativas como este festival, os Concertos do Xacobeo continúan impulsando un modelo cultural descentralizado, que leva propostas de calidade a todo o territorio galego e contribúe á dinamización económica e turística das vilas e comarcas mediante a celebración de eventos singulares."
A entrada ao festival será de balde. A programación musical inclúe a actuación do grupo de música tradicional Treixadura. A animación infantil correrá a cargo de Pablo Estévez cun novo espectáculo de maxia familiar denominado Trasnadas, mentres que a agrupación As Lapacaldas, xunto con Airiños dos Foles, encargarase da foliada.
Manuel Pardo subliñou que na provincia de Ourense, neste 2026, o programa da Xunta de Galicia xa apoia preto dunha vintena de eventos culturais, contribuíndo a descentralizar a oferta e a levar propostas musicais de primeiro nivel a diferentes puntos do territorio.
