A xustiza anulou o decreto de cesamento e ordenou a reincorporación da funcionaria, ao considerar que as discrepancias técnicas alegadas polo goberno local non xustifican a súa saída do posto. A decisión do Concello de Ourense de recorrer ante o TSXG abre unha nova fase xudicial nun conflito que afecta a un posto clave da estrutura económico-financeira municipal.
Máis aló das discrepancias de carácter técnico que xurdiron no desempeño da súa función con outros técnicos e que, conforme o indicado pola Dirección Xeral de Estabilidade Orzamentaria e Xestión Financeira Territorial, puidesen liquidarse, non co cesamento dun dos discrepantes, senón coa reorganización das funcións asignadas aos funcionarios de habilitación nacional.
A maxistrada da praza número 1 da Sección do contencioso-administrativo do Tribunal de Instancia de Ourense estimou o recurso presentado pola propia tesoureira local e polo Colexio Territorial de Secretarios, Interventores e Tesoureiros da Administración Local. A resolución xudicial anula o decreto municipal que ordenaba o cesamento da funcionaria e acorda o seu regreso, incluíndo a compensación dos haberes que procedan.
A Alcaldía de Ourense, dirixida por Gonzalo Pérez Jácome, decretara o cesamento da funcionaria alegando “continuas incidencias”, como a negativa do departamento municipal á contabilización de actos e acordos locais. Segundo a sentenza, estas incidencias estaban motivadas por “discrepancias con outros órganos e servizos” por “cuestións puramente formais sen transcendencia xurídica substancial”.
Con todo, a xuíza considera que os motivos presentados para o cesamento non demostran que a aptitude e idoneidade para o posto, apreciadas no seu día, xa non concorran. A sentenza suxire que as discrepancias técnicas poderían terse resolto mediante a reorganización de funcións, en lugar do cesamento da funcionaria.
