O volei praia vive un momento de auxe na cidade de Ourense, impulsado en gran medida polo Club Ourense Volei Praia. Esta entidade, recoñecida como un dos principais referentes do deporte a nivel autonómico, deu un paso decisivo esta tempada ao competir a nivel estatal, tanto individualmente como cos seus dous equipos sénior nas Ligas Nacionais.
O suplemento +Deporte La Región, atento aos éxitos do club ourensán, organizou unha actividade conxunta que serviu como xornada de traballo e que reuniu a preto de 80 xogadores da canteira.
Baixo a presidencia de Elena Sardiña e a dirección técnica de Alexandre Prada, o club experimentou un crecemento constante nas últimas tempadas. Actualmente conta con máis de douscentos deportistas, destacando pola súa presenza en competicións autonómicas e nacionais, e cunha notable proxección internacional.
O Club Ourense Volei Praia domina os circuítos autonómicos dende a categoría alevín ata a sénior. A nivel nacional, destaca a participación individual de Víctor López de Miguel, quen forma parte da Concentración Permanente da Federación Española sub-20 e debutou recentemente no Circuíto Mundial Sub-19, acadando unha novena posición xunto a Gaizka Guerrero.
