O programa, que se desenvolveu durante cinco xornadas, tivo como obxectivo principal dotar aos menores de ferramentas para a prevención e o comportamento seguro no ámbito dixital. Os temas abordados incluíron o sexting, o grooming, contidos inapropiados e o comportamento nas redes sociais, así como a protección da privacidade e a identificación de contidos potencialmente prexudiciais.

O inspector delegado de Participación Cidadá da Comisaría de Ourense, Felipe Rodríguez, destacou a excelente resposta do alumnado e o interese dos centros educativos e as asociacións de pais e nais (AMPA) por este tipo de formación. Tamén se subliñou a importancia de ensinar aos pais técnicas como o control parental para supervisar a navegación dos seus fillos.

A formación tamén fixo énfase na importancia de comportarse nas redes sociais do mesmo xeito que no mundo real, abordando o bullying e o ciberbullying. Ensinouse aos alumnos a identificar, deter e adoptar boas prácticas de comportamento en liña, lembrándolles que o perigo reside en non coñecer a identidade de quen está detrás dunha pantalla.