A directora xeral de Xuventude, Lara Meneses, puxo en valor o éxito dun verán activo e educativo, subliñando as oportunidades que a Xunta de Galicia ofrece á cativada e ás familias para gozar do estío con experiencias e aprendizaxes únicas. A súa visita realizouse aos participantes do campamento Supervivencia en Bande, unha das propostas da campaña de verán na provincia de Ourense, que conta con 1.136 prazas.
Meneses invitou aos mozos a "aproveitar ao máximo todas as actividades das que dispoñen para xerar recordos inesquecibles e xerar lazos sociais". Tamén destacou a aposta da Xunta de Galicia por mellorar a oferta estival, que este ano alcanza as 11.932 prazas en toda a Comunidade, a maior cifra da historia.
O Albergue de Bande acolle o campamento Supervivencia, onde 128 rapaces participarán en actividades de supervivencia, aventura, técnicas de operación, cartografía, nudos, tallas de madeira, ademais de propostas ambientais e deportivas, en catro quendas ata o 13 de agosto.
A representante do Goberno galego tamén saudou aos participantes no campamento Teatro e aventura na natureza, no Albergue Penedos de Xacinto en Entrimo (Ourense). Alí, visitou a segunda quenda dunha iniciativa que ofrece 400 prazas totais, permitindo aos asistentes gozar de actividades de teatro, deportivas, de aventura e saídas na natureza.
A campaña Modo Verán Activo inclúe campamentos para nenos e nenas de 9 a 17 anos con 8.050 prazas en 36 instalacións. Complementan a oferta os minicampamentos Coñece Galicia (876 prazas), actividades de ocio educativo para maiores de 18 a 30 anos (160 prazas) e campos de voluntariado (815 prazas).
Ademais, a Consellería de Cultura, Lingua e Xuventude facilita o uso das súas instalacións xuvenís a asociacións, entidades prestadoras de servizos á mocidade, escolas de tempo libre e outras entidades públicas ou privadas que organicen plans para mozos e mozas, sumando 1.270 prazas.
