O Club Ourense Baloncesto (COB) confirmou a renovación de Martín Fernández, un dos xogadores máis aprezados pola afección do Pazo. O escolta de Vilagarcía permanecerá unha tempada máis na disciplina do equipo ourensán, destacando a súa boa adaptación á categoría e as ganas de seguir progresando.

Fernández expresou a súa felicidade por continuar no club: "Estou moi cómodo e moi contento de estar no COB. É un club moi profesional e á vez moi familiar, con moi boas persoas. Ademais, xogar en Galicia tamén tira". Tras chegar da Segunda FEB, o xogador considera que xa está "asentado na categoría" e desexa "dar aínda máis", tras pechar a liga con case 8 puntos por partido e un rol protagonista.

A figura do adestrador Moncho López tamén foi clave na decisión. "Esíxenos moito a todos", recoñece o xogador, "pero se unha persoa gasta o seu tempo e a súa enerxía en corrixirte é porque te valora e impórtalle". Fernández comprométese a aceptar "calquera corrección ou apunte" do corpo técnico para "aprender o máximo posible".

A renovación de Fernández suma un nome máis ao bloque que o club quere construír, algo que o xogador considera "moi importante e que non moitos equipos conseguen". Destaca que o COB "xerou ambición" no mercado, algo que non todos os clubs poden transmitir. Tamén tivo palabras de eloxio para o seu novo compañeiro, Jan Zidek, "un xogador que me gusta moito", "polivalente" e cunha "moi boa man".

Pola súa banda, Moncho López mostrouse "moi contento" coa continuidade do escolta, sinalando que a renovación foi "moi rápida" xa que o xogador "transmitiu tamén o seu interese por renovar". O técnico subliña que se trata dun "fichaxe" que supón manter a un xogador "en constante progresión" e "un xogador galego", algo que "nos gusta moito".

López prevé que Fernández terá "un rol parecido" ao da tempada pasada, saíndo "moitas veces dende o banco", aínda que ten "calidade para ser titular". O obxectivo é que "nos dea o mesmo nivel en xeración de puntos e, se é posible, ampliando a súa gama de recursos". A mellora na capacidade de pase, xunto coa súa capacidade anotadora, podería converter ao xogador "nacional " nun "determinante na liga".