A Xunta de Galicia deu luz verde ao proxecto do novo viario de acceso ao Complexo Hospitalario Universitario de Ourense (CHUO) desde a estrada N-525. A conselleira de Vivenda e Planificación de Infraestruturas, María Martínez Allegue, presentou a iniciativa, que reforzará a mobilidade e a conectividade co hospital.
O novo viario conectará a N-525 co acceso ao CHUO, atravesando transversalmente a cidade de oeste a leste. Segundo explicou M. Allegue, esta actuación evitará rodeos tanto aos veciños de Ourense como aos usuarios do complexo hospitalario.
O proxecto, cuxa aprobación provisional foi dada a coñecer polo Consello da Xunta a semana pasada, avanza agora coa exposición pública, incluíndo a expropiación de 24 predios. O prazo para presentar alegacións estará aberto ata o vindeiro 21 de setembro.
Esta intervención, considerada un compromiso do Executivo galego coa cidade, suporá un investimento de máis de 4,3 millóns de euros con fondos propios da Xunta. Sumada aos 12,7 M€ da rolda Leste, o investimento conxunto en novas infraestruturas viarias para Ourense ascende a 17 M€, ademais duns 3 M€ en reforzos de firme.
O trazado terá unha lonxitude aproximada de 640 metros e discorrerá desde a estrada nacional ata a avenida do Regato. Contará con dúas calzadas de dous carrís de subida e un de baixada, separadas por unha mediana de 2 metros, ademais de beirarrúas e zonas de aparcamento. Incluirá tamén dúas glorietas e conexións con viarios municipais como o Camiño Romano, o Camiño das Laxas e a rúa Ramón Abelas.
A conselleira destacou que esta obra facilitará o acceso aos servizos da sanidade pública e enmárcase no traballo da Xunta para mellorar a vida dos cidadáns en Ourense, lembrando outras actuacións como a senda de Reza (1,4 M€), a senda do Barbaña (5,4 M€) ou a pasarela de Cudeiro (máis de 430.000 €).
