A Subdelegación de Defensa en Ourense foi escenario este martes do seu acto institucional anual, un evento que serviu para tender unha ponte entre o pasado e o presente da vocación de servizo á cidadanía. O coronel do Exército de Terra, Jesús Antonio Peñas Preckler, e o capitán de navío Jesús Ángel Paz Pena, lideraron a xornada.
Un dos momentos máis emotivos foi o recoñecemento aos efectivos que loitaron contra a vaga de incendios que asolou a provincia en agosto de 2025. Nesa crise, chegaron a despregarse máis de 900 militares, a metade deles da Unidade Militar de Emerxencias (UME). O capitán Omar Queipo Martínez recolleu o galardón para este corpo, destacando o capitán Paz Pena a súa "capacidade estratéxica para coordinar ao resto de unidades despregadas" ademais da súa entrega en primeira liña de fogo.
A cerimonia tamén tivo un xesto cara ao pasado, rendendo homenaxe aos militares ourensáns falecidos na Guerra de Cuba a finais do século XIX. Entregáronse certificados conmemorativos personalizados dos soldados caídos, recollidos polo concello e a Deputación en representación dos 92 concellos da provincia, asegurando que a súa memoria retorne ás parroquias de orixe.
Mirando cara ao futuro, o concurso "Carta a un Militar Español" premiou o talento novo. O alumno de 4º da ESO do CPR Padre Feijóo Zorelle, Samuel Alejandro Gómez, recibiu o galardón provincial pola súa carta, lida ante os asistentes, que homenaxeaba "a valentía e o espírito de equipo" dos pioneiros do voo Plus Ultra.
Pola súa banda, o Premio Cachamuiña 2026 foi para o colexio Manuel Sueiro, recoñecendo a súa constancia en concursos do Exército de Terra durante máis de cinco anos. O director, José Manuel Rego, e a profesora Pilar Iglesias, recolleron o premio. A banda sonora do evento correu a cargo da banda da Brilat.
