O episodio de calor extrema, que xa provocou rexistros superiores aos 40 graos en localidades como Ourense, Salceda de Caselas e Arbo, mantense activo. A administración autonómica activou o seu plan de actuacións sanitarias ante os riscos que estas condicións supoñen para a saúde da poboación.
As zonas máis afectadas pola alerta vermella inclúen o interior das provincias da Coruña, Lugo e Pontevedra, así como a montaña de Ourense. Pola contra, áreas como A Mariña, A Costa da Morte e o sur ourensán quedan fóra dos avisos vixentes.
Debido á gravidade da situación, a Secretaría Xeral para o Deporte decretou a suspensión de toda a actividade deportiva federada que se realice no exterior nas zonas con aviso vermello. Esta medida estará vixente este domingo entre as 12.00 e as 20.00 horas.
