A protesta enmárcase no rexeitamento á implantación do convenio estatal do sector, coñecido como convenio ARTE, impulsado por grandes empresas. Segundo as traballadoras, este novo marco normativo implicaría un retroceso significativo nos dereitos adquiridos durante anos de negociación colectiva.
Entre as principais preocupacións destaca a perda do recoñecemento da antigüidade, un elemento clave na mellora salarial e a estabilidade laboral. As convocantes consideran que este proceso representa un punto de inflexión para o sector téxtil na provincia e advirten de que continuarán coas accións reivindicativas se non se garanten unhas condicións laborais dignas.
“"O convenio estatal impulsado pola patronal ARTE recorta dereitos e centraliza a negociación laboral."
A xornada de folga tivo un forte impacto a nivel autonómico. Miles de traballadoras e traballadores do gran comercio téxtil e do calzado saíron ás rúas en distintas cidades galegas para protestar contra o devandito convenio. A convocatoria, promovida pola CIG, rexistrou un seguimento masivo, especialmente nas provincias da Coruña e Pontevedra, onde numerosas tendas permaneceron pechadas ou funcionando con servizos mínimos.
As mobilizacións estendéronse por cidades como A Coruña, Vigo, Pontevedra, Lugo, Ferrol, Santiago de Compostela e Vilagarcía. O paro tivo un impacto visible en centros comerciais e principais eixes comerciais, con decenas de establecementos pechados e outros atendidos unicamente por persoal eventual ou encargado.
