A decisión de ir á folga xorde ante o que os traballadores describen como “incumprimentos, negativas e evasivas” da Deputación. Segundo o comité de empresa, a pesar do acordo alcanzado en 2024, que puxo fin a mobilizacións previas, as melloras salariais e o reforzo de persoal prometidos non se materializaron.
Pola súa banda, o presidente da Deputación de Ourense, Luis Menor, defendeu a xestión provincial, asegurando que se produciron avances significativos. Menor lembrou que o servizo foi rescatado e que os bombeiros pasaron a ser empregados públicos fixos, ademais de destacar a creación dunha bolsa de interinos e a convocatoria de 17 novas prazas.
“"Se non fixemos os deberes, dende logo fixemos moitas cousas."
Con todo, o presidente do comité de empresa, Roberto Fernández, insiste en que o convenio non se está a cumprir e que o cadro de persoal segue sendo insuficiente. Os bombeiros levan anos cubrindo a carga de traballo con horas extraordinarias constantes, unha situación que agora rexeitan manter de forma permanente.
“"Seguimos con servizos mínimos e non arrancan. Non estamos dispostos a soster isto de forma permanente."
Fernández tamén denunciou o bloqueo das subas salariais ligadas ao IPC e a existencia de gardas pendentes de pago, situacións que, segundo el, si se están aplicando noutras provincias. A folga comezará coa non realización de horas extra e podería intensificarse con mobilizacións se non se chega a un acordo.
