A Fiscalía atribúe aos dous individuos unha serie de asaltos, sendo o de Ourense un dos primeiros rexistrados. Para acceder ao inmoble, os acusados forzaron a porta e subtraeron dous reloxos de pulseira, diversas ferramentas e unha batedora. A propietaria da vivenda non reclama indemnización, xa que recuperou parte dos obxectos e foi compensada pola súa aseguradora.
Este roubo na capital ourensá é o único fóra da provincia de Pontevedra na longa lista de delitos imputados. A maioría dos asaltos ocorreron en domicilios particulares, e o escrito da Fiscalía detalla que os acusados non dubidaban en empregar a forza para acceder ás propiedades.
O botín que buscaban era variado, aínda que lle daban especialmente aos obxectos tecnolóxicos. Sen embargo, non lle facían asco a nada: vaixela, ferramentas ou mercadoría.
Inicialmente, os acusados utilizaban enganos para distraer aos propietarios. Nos primeiros dous roubos, o home entretiña á vítima no exterior mentres a súa cómplice entraba na vivenda en busca de obxectos de valor. Posteriormente, cambiaron a súa estratexia, facéndose pasar por traballadores de Fenosa para inspeccionar instalacións eléctricas. A partir de aí, a forza converteuse no seu método principal de acceso.
A Fiscalía solicita para cada un dos acusados unha pena de catro anos de prisión por un delito continuado de roubo con forza en interior de domicilio.
