A circulación estará completamente pechada a partir das 15:00 horas nos tramos afectados polo percorrido da proba. A reapertura do tráfico realizarase de forma progresiva unha vez que finalice a etapa, cuxa chegada á meta en Reboredo está prevista arredor das 17:30 horas.
A carreira atravesará varios núcleos do concello, o que impactará directamente na mobilidade en zonas como Rante, Cruz de Rante, o propio San Cibrao das Viñas, Piñeiral, Cumial e Reboredo, onde se situará a meta. Durante o desenvolvemento da proba, non se permitirá a entrada nin saída de garaxes, e o transporte público sufrirá desvíos, o que podería ocasionar molestias á veciñanza.
Ademais, o acceso ao polígono industrial tamén sufrirá modificacións durante a xornada. O acceso realizarase exclusivamente a través do novo acceso desde a estrada nacional N-525. Recoméndase a usuarios e traballadores planificar os seus desprazamentos con antelación para evitar incidencias.
As autoridades solicitan a máxima atención á sinalización habilitada e a colaboración da cidadanía para garantir a seguridade tanto das ciclistas como do público. A etapa, que percorrerá 109,8 quilómetros entre Lobios e San Cibrao das Viñas, contará cun amplo dispositivo de seguridade.
“"Solicítase a colaboración cidadá e anímase a veciños e visitantes a gozar do evento con responsabilidade para facilitar o seu correcto desenvolvemento."
